MS International Hotel сайжруулалтын ажлын үр дүнгээ танилцууллаа
Олон улсын хөдөлмөрийн байгууллагын SCORE HoCo хөтөлбөрийн ажлын хэсэг 2026 оны 9 дүгээр сарын 18-ны өдөр MS International Hotel-д ажиллаж, тус зочид буудлын хэрэгжүүлсэн сайжруулалтын ажлын явц, үр дүнтэй танилцлаа.
MS International Hotel нь SCORE сургалт, зөвлөх үйлчилгээний хүрээнд байгууллагынхаа үйл ажиллагаанд дараах бодит сайжруулалтыг хэрэгжүүлсэн байна. Үүнд:
- Ажилтнуудын ур чадвар, ажлын сэтгэл ханамжийг нэмэгдүүлэх;
- Ажлын байрны эмх цэгц, зохион байгуулалтыг сайжруулах;
- Хог хаягдлыг бууруулж, үйл ажиллагааны хяналтыг сайжруулах;
- Үйлчилгээний зардлыг оновчлон, үр ашгийг нэмэгдүүлэх;
- Стандарт ажиллагааны талаарх ажилтнуудын ойлголт, мөрдөлтийг сайжруулах;
- Засвар үйлчилгээний шуурхай байдал, чанарыг нэмэгдүүлэх;
- Ажил үүргийн хуваарилалт, гүйцэтгэх ажлын ойлголтыг тодорхой болгож, ажилтнуудын оролцоог нэмэгдүүлэх зэрэг ажлыг хийжээ.
Хөтөлбөрийн хүрээнд хэрэгжүүлсэн арга хэмжээний үр дүнд ажилтнуудын сэтгэл ханамжийн түвшин 72.92 хувиас 81.26 хувь болж, 8.34 нэгж хувиар өссөн нь сайжруулалтын ажлын бодит үр дүнгийн нэг болсон байна.
SCORE HoCo хөтөлбөрийн ажлын хэсэгт Хөдөлмөр, халамжийн үйлчилгээний ерөнхий газрын Хөдөлмөрийн бодлогын хэрэгжилтийн газрын ахлах мэргэжилтэн Н.Алтансувд, Соёл, спорт, аялал жуулчлал, залуучуудын яамны Аялал жуулчлалын бодлого, зохицуулалтын газрын мэргэжилтэн Б.Жаргалан, НҮБ-ын Олон улсын хөдөлмөрийн байгууллагын төслийн зохицуулагч М.Жавзандулам, Аялал жуулчлалын мэргэжлийн холбооны Сургалт хариуцсан дэд захирал С.Нина нар ажиллаж байна.
SCORE HoCo хөтөлбөр нь зочлох үйлчилгээний байгууллагуудын бүтээмж, үйлчилгээний чанар, ажилтнуудын оролцоо, ажлын байрны хамтын ажиллагааг сайжруулж, тасралтгүй хөгжлийн тогтолцоог байгууллагын үйл ажиллагаанд нэвтрүүлэхэд чиглэдэг.
