АЖМХ-НЫ 2025 ОНЫ ҮЙЛ АЖИЛЛАГААНЫ НЭГДСЭН ТАЙЛАНГ ССАЖЗ-ЫН САЙД Ж.АЛДАРЖАВХЛАНД ТАНИЛЦУУЛЛАА

Аялал жуулчлалын мэргэжлийн холбоо НЭЗХЭ-ийн удирдлагууд 2025 онд хэрэгжүүлсэн үйл ажиллагааны нэгдсэн тайлан, салбарын өнөөгийн нөхцөл байдал, тулгамдаж буй асуудал болон цаашид хэрэгжүүлэх арга хэмжээний талаар Соёл, спорт, аялал жуулчлал, залуучуудын сайд Ж.Алдаржавхланд танилцууллаа.

Аялал жуулчлалын мэргэжлийн холбоо НЭЗХЭ нь Аялал жуулчлалын тухай хуулийн 26 дугаар зүйлд заасны дагуу байгуулагдсан, ашгийн төлөө бус нийтийн эрх зүйн хуулийн этгээд юм. Тус холбоог аялал жуулчлалын чиглэлээр үйл ажиллагаа явуулдаг мэргэжлийн 13 холбооны оролцоотой байгуулсан бөгөөд дүрэм, удирдлагын бүтэц, зохион байгуулалтын асуудлыг бүх гишүүдийн оролцоонд тулгуурлан шийдвэрлэж ирсэн. Өнөөдрийн байдлаар Удирдах зөвлөлийн 29 гишүүнтэй бөгөөд хуульд заасан 10 гаруй чиг үүргийг хэрэгжүүлэн ажиллаж байна.

Уулзалтын үеэр 2025 оны үйл ажиллагааны үр дүн, төрийн зарим чиг үүргийг хэрэгжүүлэх гэрээний биелэлт, салбарын санхүүжилт болон тулгамдсан асуудлуудын талаар мэдээлэл өгч, санал солилцов.

2025 онд нийт 17 ажил хэрэгжүүлжээ

Аялал жуулчлалын мэргэжлийн холбоо НЭЗХЭ нь 2025 онд төрийн зарим чиг үүргийг хэрэгжүүлэх гэрээний хүрээнд нийт 17 ажил, арга хэмжээг хэрэгжүүлсэн байна. Тайлант хугацаанд дараах үндсэн үр дүнд хүрчээ. Үүнд:

1. Нийт 561 байгууллага, иргэнийг бүртгэл, гишүүнчлэлийн нэгдсэн тогтолцоонд хамруулсан;
2. Мэргэжлийн 17 салбар холбоотой хамтран ажилласан;
3. Нийт 184 хөтөч-тайлбарлагчийг бүртгэж, үүнээс 112 хөтөч-тайлбарлагчийн бүртгэлийг баталгаажуулсан;
4. 269 тээврийн хэрэгсэлд жуулчин тээврийн зөвшөөрөл олгосон;
5. Сар бүр 100–150 мэдээ, мэдээлэл бэлтгэн олон нийтэд хүргэсэн;
6. Олон улсын аялал жуулчлалын таван томоохон үзэсгэлэн, форумд Монгол Улсыг сурталчлан оролцсон;
7. Орон нутаг, олон улсын байгууллага, их сургууль болон бусад байгууллагатай 16 хамтын ажиллагааны санамж бичиг байгуулсан;
8. “Аялал жуулчлалын салбарын нэгдсэн форум”, “Tourism Awards”, “Соёлтой аялъя” зэрэг салбарын томоохон арга хэмжээ, хөтөлбөрийг хэрэгжүүлсэн;
9. KOICA, JICA, UN Tourism зэрэг олон улсын байгууллагатай сургалт, хүний нөөцийн хөгжил, тогтвортой аялал жуулчлалын чиглэлээр хамтын ажиллагаагаа өргөжүүлсэн байна.

Салбарын тулгамдсан асуудлыг хэлэлцэв

Уулзалтаар аялал жуулчлалын салбарын аж ахуйн нэгжүүдэд олгож буй хөнгөлөлттэй зээлийн нөхцөл болон шатахууны хангамжийн хүндрэл салбарын үйл ажиллагаанд сөргөөр нөлөөлж байгааг онцлон хэлэлцэв.

Цаашид хөрөнгө оруулалт, хөнгөлөлттэй зээлийн бодлогыг салбарын бодит хэрэгцээнд нийцүүлэн зам дагуух үйлчилгээний төв, түр буудаллах цэг, байршуулалтын хэрэгсэл болон бусад аялал жуулчлалын бүтээгдэхүүн, үйлчилгээний төрлөөр ангилан төлөвлөх шаардлагатайг дурдлаа. Ингэснээр хөрөнгө оруулалтын чанар, үр өгөөж, хүртээмжийг нэмэгдүүлэх боломжтой гэж үзэв.

Мөн Төрийн хэмнэлтийн тухай хуулийн холбогдох зохицуулалт 2026 оны 12 дугаар сарын 31-ний өдрийг хүртэл үйлчлэхтэй холбоотойгоор Монгол Улсыг олон улсын аялал жуулчлалын үзэсгэлэн, арга хэмжээнд сурталчлах ажлын санхүүжилт, оролцооны хэлбэр, зохион байгуулалтыг эртнээс тодорхой болгох шаардлагатай талаар санал солилцлоо.

Сайдын өгсөн үүрэг, чиглэл

Уулзалтын үр дүнд Соёл, спорт, аялал жуулчлал, залуучуудын сайд Ж.Алдаржавхлан дараах үүрэг, чиглэлийг өглөө. Үүнд:

1. Аялал жуулчлалын тухай хуульд нийцүүлэн салбарын байгууллагуудын төлөөлөл болон бүх гишүүний оролцоог хангасан Нэгдсэн холбооны хурлыг зохион байгуулж, үр дүнг холбогдох журмын дагуу албажуулах;
2. Нэгдсэн холбооны хуралд оролцох байгууллага, салбар холбоодын бүртгэл, төлөөллийн зохистой харьцааг хангаж, хурлын бэлтгэл ажлыг зохион байгуулах;
3. Салбарын бодлого, үйл ажиллагааг нэг чиглэлд уялдуулж, төр, мэргэжлийн холбоо болон хувийн хэвшлийн хамтын ажиллагааг сайжруулах;
4. Хөнгөлөлттэй зээлийн хэрэгжилт, тулгамдсан хүндрэл болон аж ахуйн нэгжүүдийн хэрэгцээ шаардлагыг судалж, шийдвэрлэх санал боловсруулах;
5. Хөрөнгө оруулалт, зээлийн бодлогыг аялал жуулчлалын бүтээгдэхүүн, үйлчилгээний төрлөөр ангилан төлөвлөж, хөрөнгө оруулалтын чанар, үр өгөөжийг нэмэгдүүлэх;
6. 2026 онд оролцох шаардлагатай олон улсын аялал жуулчлалын үзэсгэлэн, арга хэмжээний ач холбогдол, төсөв, хүлээгдэж буй үр дүнг тооцсон нэгдсэн санал, төлөвлөгөө боловсруулан танилцуулах;
7. Төрийн хэмнэлтийн тухай хуулийн холбогдох зохицуулалттай уялдуулан олон улсын үзэсгэлэнгийн санхүүжилт, оролцооны хэлбэр, зохион байгуулалтын асуудлыг тодорхой болгох;
8. Төрийн зарим чиг үүргийг хэрэгжүүлэх гэрээний биелэлт, зарцуулалт болон хүрсэн үр дүнг хэмжигдэхүйц тоон үзүүлэлтээр нэгтгэн тайлагнах.

Аялал жуулчлалын мэргэжлийн холбоо НЭЗХЭ болон салбар холбоод Нэгдсэн холбооны хурлын бэлтгэл ажилд идэвхтэй оролцож, хуульд нийцсэн зохион байгуулалтыг ханган ажиллахад бэлэн байгаагаа илэрхийллээ.