ГУРВАН УЛСЫН АЯЛАЛ ЖУУЛЧЛАЛЫН ХАМТЫН АЖИЛЛАГААГ БЭХЖҮҮЛЭВ

Монгол Улс, БНХАУ, ОХУ-ын Аялал жуулчлалын сайд нарын есдүгээр уулзалт өнөөдөр болж, гурван улсын дипломат харилцаа, хамтын итгэлцэл, аялал жуулчлалын хамтын хөгжлийг бэхжүүлэхэд “Цайны зам” хуралдаан чухал алхам болов.

ТҮҮХЭН ХАМТЫН АЖИЛЛАГААНЫ ҮРГЭЛЖЛЭЛ

“Цайны зам” бол XVII зуунаас эхтэй худалдааны гол зам төдийгүй гурван улсын ард түмнийг холбосон найрсаг харилцаа, соёлын солилцооны гүүр байсаар ирсэн. Өнөөдөр энэ түүхэн замыг аялал жуулчлалын шинэ коридорт хөгжүүлж, Евразийн улс орнуудыг холбосон чухал эдийн засгийн бүс болгон өргөжүүлэх зорилттой байна.

ХАМТЫН АЖИЛЛАГААНЫ БОДИТ АХИЦ

Сүүлийн нэг жилд гурван улсын хооронд аялал жуулчлалын урсгалыг нэмэгдүүлэх бодит алхмууд хийгдлээ. Үүнд:

* Монгол–БНХАУ, Монгол–ОХУ чиглэлийн шууд нислэг, шинэ чиглэлүүд нэмэгдсэн;

* Улаанбаатар–Бээжин галт тэрэг 5 жилийн дараа дахин хөдөлж эхэлсэн;

* ОХУ-тай хиллэдэг Алтанбулаг боомтын өргөтгөл дуусч, хүчин чадал 2 сая зорчигч хүлээн авах боломжтой болов;

* Сүнбэр, Рашаантын боомтууд байнгын ажиллагаатай болж, аяллын урсгалд шинэ боломж нээлээ. Эдгээр ажлын үр дүнд 2025 оны 10 сарын байдлаар хөрш орнуудаас Монгол Улсад ирсэн жуулчдын тоо 18% өссөн байна.

ИРЭЭДҮЙН ХАМТЫН ЗОРИЛТ

Дэлхий даяар аялал жуулчлал эрчимтэй өсөж буй энэ үед гурван улс “Цайны замын аялал жуулчлалын коридорыг” хөгжүүлж, жуулчдын урсгалыг нэмэгдүүлэх, бүс нутгийн эдийн засгийн өгөөжийг өсгөх чиглэлээр нягт хамтран ажиллахаар тохиров.