МОНГОЛ УЛС АЯЛАЛ ЖУУЛЧЛАЛЫН ӨСӨЛТӨӨР АЗИ, НОМХОН ДАЛАЙН БҮСЭД 4 ДҮГЭЭРТ ЭРЭМБЭЛЭГДЛЭЭ
НҮБ-ын Аялал жуулчлалын байгууллагаас (UN Tourism) гаргасан 2026 оны эхний хагас жилийн тайланд Монгол Улс олон улсын аялал жуулчлалын өсөлтөөр тэргүүлэх үзүүлэлттэй орнуудын нэгээр нэрлэгдлээ.
Тайлангийн мэдээллээр Монгол Улс:
- Ази, Номхон далайн бүсийн аялал жуулчлалын хамгийн өндөр өсөлттэй орнуудын жагсаалтад 39 хувийн өсөлтөөр 4 дүгээрт;
- Олон улсын аялал жуулчлалын зарцуулалтын өсөлтөөр 29 хувийн үзүүлэлттэй 2 дугаарт;
- Аялал жуулчлалын орлогын өсөлтөөр 27 хувийн үзүүлэлттэй 3 дугаарт;
- Дэлхийн аялал жуулчлалын хамгийн өндөр өсөлттэй 20 улсын жагсаалтад 39 хувийн өсөлтөөр 4 дүгээрт тус тус эрэмбэлэгдсэн байна.
Эдгээр үзүүлэлт нь Монгол Улсыг зорих олон улсын жуулчдын урсгал эрчимтэй нэмэгдэж, аялал жуулчлалын салбарын эдийн засагт үзүүлэх нөлөө өргөжиж байгааг харуулж байна. Мөн Монгол Улсын аялал жуулчлалын бүтээгдэхүүн, үйлчилгээний олон улсын зах зээл дэх эрэлт нэмэгдэж, бүс нутгийн хэмжээнд өрсөлдөх чадвар сайжирч буйн илэрхийлэл болж байна.
Цаашид энэхүү өсөлтийг тогтвортой хадгалахын тулд аялал жуулчлалын бүтээгдэхүүн, үйлчилгээний чанар, хүртээмжийг сайжруулах, агаарын болон авто замын тээврийн холболтыг нэмэгдүүлэх, жуулчдын Монгол Улсад байх хугацаа болон зарцуулалтыг өсгөхөд чиглэсэн бодлого, үйл ажиллагааг эрчимжүүлэх шаардлагатай юм.
Эх сурвалж: НҮБ-ын Аялал жуулчлалын байгууллага (UN Tourism), 2026 оны эхний хагас жилийн аялал жуулчлалын үзүүлэлт.
