“Монголын эдийн засгийн форум 2022-Шинэ сэргэлт”-ийн хүрээнд Уул уурхай, хүнд үйлдвэрийн яам, Хүнс, хөдөө аж ахуй, хөнгөн үйлдвэрийн яам, Байгаль орчин, аялал жуулчлалын яам, Соёлын яамнаас зохион байгуулсан “Аж үйлдвэржилтийн сэргэлт” урьдчилсан хэлэлцүүлгийн хүрээнд “Шинэ сэргэлтийн бодлого-Аялал жуулчлал” хэлэлцүүлэг энэ сарын 24-нд боллоо.
Хэлэлцүүлгийг нээж Байгаль орчин, аялал жуулчлалын сайд Б.Бат-Эрдэнэ Шинэ сэргэлтийн бодлогын хүрээнд “Аялал жуулчлалын үйлдвэрлэлийг хөгжүүлж, эдийн засгийн өсөлтийг дэмжих нь” сэдвээр үг хэлэв. Тэрбээр хэлсэн үгэндээ, “Өнөөдөр бид өнгөрсөн хоёр жилд болж өнгөрсөн бүхнийг ярихаасаа ирээдүйн 20 жилийн хөгжлөө тодорхойлох нь зүй юм. Ингэхдээ Аялал жуулчлалын мэргэжлийн холбоотой хамтарч, аж ахуй нэгжүүдийг дэмжиж ажиллахад анхаарлаа хандуулах болно” гэлээ.
Тус хэлэлцүүлэгт УИХ-ын гишүүн Д.Цогтбаатар, Монголын аялал жуулчлалын холбооны Ерөнхийлөгч Д.Гантөмөр, Аялал жуулчлалын зөвлөх, олон улсын эксперт Б.Индраа, “Шинэ бага хүрээ” ХХК-ийн Гүйцэтгэх захирал Б.Болормаа, Монголын ресторан зоогийн газрын холбооны Ерөнхийлөгч М.Есөнмөнх болон аялал жуулчлалын салбарын төлөөллүүд оролцлоо.